KWA NINI TUFIKIRI KUHUSU TATIZO BADALA YA SULUHU?

Hata kama hatupati wateja hakuna haja ya kunung'unika

Ni wangapi kati yetu ambao hatujawahi kupatwa na tatizo au matatizo maishani mwetu? Bila shaka hakuna na kama yupo au wapo ni wazi huyo au watu hao watakuwa ni watu wa historia. Watakuwa ni watu wa historia kwa sababu matatizo ni sehemu ya maisha na kwa hiyo kuwepo kwake ndipo maisha hukamilika.

Maisha haya yangekuwepo bila matatizo ni wazi yangekinaisha haraka sana. Yangekinaisha kwa sababu yasingekuwa na maana yeyote. Maana na utamu wa maisha upo katika kupambana na mazingira na kupata ufumbuzi wa jambo. Kitendo cha kupata ufumbuzi wa jambo na kusonga mbele ni kitendo chenye kushika maana halisi ya maisha. Kitendo cha kupambana na kushindwa pia ndo maisha yenyewe. Kama ingekuwa kila anachotaka mtu anakipata maisha yangepoteza maana yake.

Ina maana kwamba kila mmoja kati yetu ni mtaalamu wa matatizo kwa maana kwamba anafahamu kwa vitendo. Lakini kwa bahati mbaya siyo wote kati yetu ambao tunaweza au kujua namna ya kuyatatua matatizo yetu, lakini mbaya zaidi namna ya kufanya matatizo yasituharibie maisha yetu. Kwa kuwa matatizo ni sehemu muhimu katika maisha yetu ni wazi hatuwezi kuyakwepa. Kwa kuwa hatuwezi kuyakwepa inabidi tujue namna ya kuyakubali bila kutuumiza, ujuzi ambao wengi wetu hatunao.

Tunapopatwa na tatizo au matatizo huwa hatujui kwamba dawa ni kutafuta ufumbuzi wa tatizo au matatizo hayo. Katika kutokujua huko huwa tunajikuta tukichimba na kuchimba hadi ndani kabisa ya tatizo bila kufika mwisho. Tunatumia muda wetu mwingi mwingi kufikiria kuhusu tatizo au matatizo hayo kiasi kwamba inatuwia vigumu sana kwetu kuona kitu kingine ambacho ndicho muhimu zaidi kuliko tatizo au matatizo yanayotukabili.

Kwa kawaida tunapokabiliwa na tatizo kitu ambacho kinatakiwa kuzijaza fikra zetu siyo tatizo hilo bali njia za kupata suluhu ya tatizo. Lakini kwa bahati mbaya kama tunavyobainisha kinachozijaza fikra zetu huwa ni tatizo lenyewe. Kwa hali hiyo tatizo hilo hukuzwa na fikra hizo hadi kufikia mahali ambapo tutaliona tatizo hilo kama dubwana ambalo tayari limeyameza maisha yetu.

Fikira zetu hutuambia kwamba ni lazima tutashindwa na hutuambia na kutushawishi kuamini kwamba ni sisi peke yetu tu ndiyo ambao hupatwa na matatizo. Ili kuepuka uongo huu ambao huletwa kwetu na fikra zetu hatuna budi badala ya kuzijaza fikra hizo na tatizo lenyewe tuzijaze kwa njia ya kufikiri suluhu au ikiwezekana kwa suluhu yenyewe. Kwa kuzijaza fikra hizo kwa njia ya kufikiri suluhu ya tatizo tunajipa moyo kwamba inawezekana na tunajitoa kwenye hofu ambazo zinaweza kutufanya tukashindwa kukabiliana na tatizo ili tuendelee na maisha.

Wengi wetu tuwataalamu wa kuzichosha fikra zetu kwa kuwaza juu ya tatizo tulionalo mkononi badala ya kuzijaza fikra hizo kwa njia ya kufikia suluhu ya tatizo njia za kutuwezesha kulimaliza tatizo hilo. Kama ni hivyo ni kwa nini tusiamue kubadilika sasa hivi.

Kwa mfano kama tuna tatizo la kushindwa kuwapeleka watoto shule kutokana na kukosa fedha za ada hatutakiwi kufikiri kuhusu tatizo hilo yaani kuwaza kuhusu itakavyotokea namna watu watakavyotuona jinsi watoto watakavyokuwa bila elimu na mengine ya namna hiyo. Badala yake tunatakiwa kuwaza namna ambavyo tutajitahidi kuhakikisha kwamba watoto wanakwenda shule. Haya ndiyo maisha ambayo katika mchanganyiko wake ni lazima kuwe na matatizo..